A xerente do Clúster Tecnolóxico Empresarial das Ciencias da Vida (Bioga) explica que hai 67 entidades socias representativas da biotecnoloxía en Galicia
No Clúster Tecnolóxico Empresarial das Ciencias da Vida (Bioga) hai 67 entidades socias «representativas da cadea de valor da biotecnoloxía en Galicia. Da provincia son 34, cos focos principais arredor do Campus Vida de Santiago; e na Coruña, na Universidade e na área metropolitana», sintetiza Loli Pereiro, xerente de Bioga.
-Como é o sector biotecnolóxico?
-Temos identificadas unhas 90 empresas biotecnolóxicas e 250 máis usuarias en Galicia. O sector facturou máis de 320 millóns en 2018 e confiamos superar os 350 en 2019. Nos últimos 5 anos aumentamos a un ritmo dun 10 % anual e hai moito aínda por facer.
-Ten moito peso na provincia?
-A maior facturación e emprego está talvez no Porriño. Na provincia da Coruña teñen a sede a maioría das empresas galegas de base tecnolóxica, que emerxen a partir da transferencia de tecnoloxía das universidades de Santiago e da Coruña, con persoal investigador que quere emprender e van medrando. Aquí a maioría teñen menos de 10 empregos.
-A que atribúe o crecemento do sector nestes últimos anos?
-A que na sociedade actual está a despuntar a bioeconomía, o aproveitamento dos recursos naturais orientados para a alimentación ou a detección precoz de doenzas e o descubrimento de novos fármacos.
-Que prioridades ten Bioga?
-Bioga comezou con tres empresas. Agora ofrecemos axudas ás que comezan, para que se asenten; e tamén nos preocupa a xestión do talento, porque cada vez se demandan profesionais máis específicos que se adapten ás necesidades e á transversalidade das empresas.
-Que persoal demandan?
-Especialistas en Farmacia, Bioloxía, Química, Biotecnoloxía, Medicina ou Veterinaria, que teñen que interactuar con enxeñeiros e outros perfís para desenvolver novos produtos e servizos nos que traballan as empresas.
-En Santiago hai dous proxectos de futuro…
-Si, e os dous favorecerán a biotecnoloxía: un biopolo no polígono da Sionlla, no que colaboramos coa Asociación de Empresarios do Polígono do Tambre; e un Hub de innovación dixital, que coordinamos desde Bioga e que implicará a sete clústeres.
Joel Gómez. Ver noticia original
Noticias Relacionadas
El sector biotecnológico factura más de 150 millones de euros en la provincia de A Coruña
Confianza en la expansión tras superar los años de la crisis económica
Get Connected